ÌTÚPALẸ̀ ÌWÉ ÌTÀN-ÀRÒSỌ TA Ń LỌMỌ TÍ DIÍPỌ̀ GBÉNRÓ KỌ

Kíkọ ìwé ìtàn-àròsọ jẹ́ ọ̀kan pàtàkì lára àwọn iṣẹ́ ọnà aláwòmọ́ lítíréṣọ̀ tí àwọn onímọ̀ àti àwọn oníṣẹ́ lámèyítọ́ kó kọyán rẹ̀ kéré rárá. Àwọn òǹkọ̀wé ìwé ìtàn-àròsọ sì pọ̀ níye tó bẹ́ẹ̀ gẹ́ẹ́ tó fi jẹ́ pé, ìwé ìtàn-àròsọ tó wà lórí àtẹ lónìí kò fi lóńkà mọ́. Bí àwọn ọkùnrin ti ń kọ lóríṣiríṣi náà ni àwọn obìnrin ń kọ. Kódà, àwọn tí kò kẹ́kọ̀ọ́ rárá nípa èdè Yorùbá tó jẹ́ pé, ọ̀tọ̀ ni ohun tí wọ́n kẹ́kọ̀ọ́ nípa rẹ̀ náà kò gbẹ́yìn nínú à ń kọ ìwé ìtàn-àròsọ. Èyí sì wáyé nítorí ìfẹ́ tí àwọn wọ̀nyẹn ní sí èdè Yorùbá, pàápàá jùlọ láti gbé àṣà àti ìṣe Yorùbá lárugẹ. Èyí sì ń mú ìdàgbàsókè dé bá ìwé ìtàn-àròsọ kíkọ àti ìsọ̀rí àwọn iṣẹ́ ọnà aláwòmọ́ lítíréṣọ̀ yòókú. Iṣẹ́ ìtúpalẹ̀ ìwé ìtàn-àròsọ Ta ń lọmọ ti Diípọ̀ Gbénró kọ ni iṣẹ́ ìwádìí yìí dálé lórí. Ète wa lórí ìṣẹ́ yìí sì ni láti wá fìn-ín ìdí kókò nípa gbogbo ohun tó ṣodo sínú ìwé náà, pàápàá jùlọ láti ṣàwárí àwọn ẹ̀kọ́ tí àwọn ìṣẹ̀lẹ̀ inú ìwé náà kọ́ni. Ní orí kìn-ìn-ní ni a ti máa ṣe ìfáàrà sí iṣẹ́ ìwádìí yìí níbi tí a ti máa sọ èròńgbà wa lórí iṣẹ́ náà tí ń ṣe ìdí kan pàtàkì tí a fi yan ìwè náà láàyò láti ṣiṣẹ́ ìwádìí lé lórí. A máa wo ibi tí iṣẹ́ ìwádìí náà yóò fẹjú dé, ọgbọ́n ìwádí tí a ṣàmúlò rẹ̀, ọ̀kan-ò-jọ̀kan àwọn ìpènijà tí a dojú kọ nínú iṣẹ́ ìwádìí náà àti àwọn àǹfààní ti iṣẹ́ náà yóò mú jáde láti fi kásẹ̀ orí náà nílẹ̀.